అలా అమెరికన్ల ఉద్యోగాలను కాపాడా: ట్రంప్​

అమెరికాలోని ఉద్యోగాల్లో స్థానికులకే తొలి ప్రాధాన్యం అనే విధానంతో ముందుకెళ్తున్నట్లు స్పష్టం చేశారు అమెరికా అధ్యక్షుడు డొనాల్డ్​ ట్రంప్​. రిపబ్లికన్​ నేషనల్​ కన్వెన్షన్​లో ప్రసంగించిన ఆయన​.. టెనెస్సీ వ్యాలీ అథారిటీ విషయంలో తాను తీసుకున్న నిర్ణయం గురించి చెప్పుకొచ్చారు.

'అమెరికా ఫస్ట్'​ నినాదంతో పాలన సాగిస్తున్న డొనాల్డ్​ ట్రంప్​.. అక్కడి ఉద్యోగాల్లోనూ స్థానికులకే పెద్దపీట వేస్తూ ఇప్పటికే చాలా నిర్ణయాలు తీసుకున్నారు. ఇటీవలే టెనెస్సీ వ్యాలీ అథారిటీ(టీవీఏ) వందల మంది అమెరికన్​ వర్కర్లను తొలగించి.. ఆ స్థానంలో తక్కువ జీతానికి పనిచేసే విదేశీ ఉద్యోగులను నియమించుకోవాలని భావించిందట. ఆ విషయంలో జోక్యం చేసుకున్న ట్రంప్​.. ఆ నిర్ణయాన్ని అడ్డుకొన్నారు. అలా వందల మంది అమెరికన్ల ఉద్యోగాలను కాపాడానని ఆయన పేర్కొన్నారు. అంతేకాదు ఆ బోర్డు ఛైర్మన్​ను తొలగించినట్లు స్పష్టం చేశారు.

రిపబ్లికన్ల తరఫున అధ్యక్ష అభ్యర్థిగా నామినేట్​ అయినట్లు అధికారికంగా ప్రకటించాక.. రిపబ్లికన్​ నేషనల్​ కన్వెన్షన్​లో ట్రంప్​ ప్రసంగించారు. అమెరికన్ల ఉద్యోగ భద్రత కోసం తాము తీసుకున్న నిర్ణయాల్లో టీవీఏ సంఘటనను ఓ ఉదాహరణగా పేర్కొన్నారు.

"టెనెస్సీ వ్యాలీ అథారిటీ వందల మంది అమెరికన్​​ ఉద్యోగులను బలవంతంగా తొలగిస్తోందని తెలుసుకున్నా. వారి స్థానాల్లో తక్కువ వేతనానికి పనిచేసే విదేశీ ఉద్యోగులను భర్తీ చేయాలని భావించారు. అయితే నేను జోక్యం చేసుకొని ఆ బోర్డు ఛైర్మన్​ను తొలగించా. ప్రస్తుతం నైపుణ్యమున్న ఆ అమెరికన్​ వర్కర్లు మళ్లీ ఉద్యోగాల్లో కొనసాగుతున్నారు. అందులో జార్జియా, అలబామా, టెనెస్సీ, కెంటకీ, మిసిసిప్పీ, ఉత్తర కరోలినా, వర్జీనియాకు చెందిన వారే ఎక్కువగా ఉన్నారు. అలా ఉద్యోగాలు తిరిగి పొందిన వాళ్లు ఈ సమావేశంలో చాలా మందే ఉన్నారు."

-డొనాల్డ్ ట్రంప్, అమెరికా అధ్యక్షుడు

ఆగస్టు మొదటి వారంలో టీవీఏ బోర్డు ఛైర్మన్​ జేమ్స్​ థాంప్సన్​, బోర్డు సభ్యుడు రిచర్డ్​ హోవర్త్​ తమ పదవుల నుంచి వైదొలగాల్సి వచ్చింది. మొత్తం ఉద్యోగాల్లో 20 శాతం విదేశీయుల కోసం కేటాయించినట్లు టీవీఏ ప్రకటన చేయడమే ఇందుకు కారణం. అనంతరం టీవీఏ సీఈఓ జఫ్​ ల్యాష్​ తమ నిర్ణయాన్ని మార్చుకున్నట్లు తెలిపారు. అమెరికన్​ వర్కర్ల స్థానంలో ప్రస్తుతం హెచ్​-1బీ వీసా వర్కర్లను నియమించుకోమని స్పష్టం చేశారు.

అవి భారతీయుల ఉద్యోగాలేనా..?

భారతీయ ఐటీ నిపుణులు ఎక్కువగా హెచ్-1బీ, ఇమ్మిగ్రెంట్ వీసాలను ఉపయోగిస్తుంటారు. వీటి ఆధారంగానే సాంకేతిక నైపుణ్యం ఉన్న విదేశీ కార్మికులను పనిచేయడానికి అనుమతిస్తాయి యూఎస్​లోని సంస్థలు. టెక్నాలజీ కంపెనీలు ప్రతి ఏటా దాదాపు పదివేల మంది ఉద్యోగులను ఇలాగే నియమించుకుంటాయి. అయితే ట్రంప్​ టీవీఏ విషయంలో తీసుకున్న నిర్ణయం వల్ల.. విదేశీ హెచ్​-1 బీ వర్కర్లలో ఎక్కువగా ఉన్న భారతీయులకే ఎక్కువ నష్టం వాటిల్లినట్లు కొన్ని నివేదికలు చెప్తున్నాయి.